toki pi jan lawa Kikamesi *180*

jan Kikamesi li jan lawa pi ma tomo Uluku

ma tomo Uluku li lon. sinpin pi ma tomo Uluku li sewi li suli. sinpin ni li kiwen. tomo Enana li tomo pi sewi meli Inana. sinpin pi tomo Enana li kiwen. sinpin ni li walo sama suno. o tawa tomo pi sewi meli Inana! o lukin! jan ante li pali ala e tomo sama. jan lawa ante li pali ala e tomo sama. jan seme li kama pali e ali ni? jan Kikamesi li jan lawa pi ma tomo Uluku. ona li kama pali e tomo sewi ni e sinpin ni. ona li suli. jan Kikamesi li utala sama soweli wawa. ona li pakala e sinpin kiwen. ona li lawa e kulupu pi jan utala ona. ona li jan lawa. jan seme li ken sama ona? jan seme li ken toki e ni: 'mi jan lawa'?
sewi meli Ninsun en jan lawa Lukapanta li mama ona. taso sewi mama Alulu li pona e sijelo ona. wan ona wan li jan. wan ona tu li sewi. ona li suli li pona lukin. jan Kikamesi li wawa li sama sewi. jan ala li wile utala e ona.
jan pi ma tomo Uluku li pilin ike tan jan Kikamesi. jan mute li tawa tomo pi jan sewi li toki e ni: "sewi o! jan Kikamesi li suli li sona. ona li wawa. nimi ona li suli. jan Kikamesi li kulupu e mije la ona li lawa e jan ni tawa utala. tan ni la mama mute li pilin ike. jan Kikamesi li jan lawa pi pona ala anu seme? jan Kikamesi li kama jo e meli li unpa e ona. tan ni la mama mute li pana e telo oko". jan Kikamesi li jan lawa pi pona ala anu seme?".

jan soweli Enkitu
sewi li kute e ni. sewi An li lawa e sewi. ona li toki e ni tawa mama sewi Alulu: "tenpo pini la sina pali e jan. o pali e jan wawa sin. o pali e jan pi sama jan Kikamesi. mi wile e ni: ona li utala e jan Kikamesi. tan ni la jan pi ma tomo Uluku li ken awen pona.

mama sewi Alulu li telo e luka. ona li kama jo e ko telo li pana e ijo ni tawa ma supa. nasin ni la jan Enkitu li kama lon. jan Enkitu li suli li wawa. sijelo ona li jo e linja mute. ona en soweli li moku e kasi anpa. ona en soweli li moku e telo. jan Enkitu li jan soweli. ona li sona ala e ilo e tomo e jan ante.

jan pi alasa soweli
jan pi alasa soweli li lon ma ni. ona li pali e lupa ma suli. soweli li tawa insa lupa la jan ni li ken kama jo e ona. jan li pali e ilo alasa kin. ona li kama jo e soweli li moli e ona. taso jan soweli Enkitu li pakala e lupa ni e ilo ni. ona li kama e ni: soweli li ken tawa weka.

jan pi alasa soweli li lukin e jan Enkitu wawa li pilin ike li wawa ala pilin. ona li tawa weka li tawa mama ona. jan pi alasa soweli li toki e ni: "mama o, jan soweli li kama tan ma nena. ona li suli li wawa. jan ala li wawa sama ona. mi pilin ike. ona en soweli li moku e kasi anpa. ona en soweli li moku e telo. tenpo ali la ona li pakala e lupa ma mi e ilo mi. mi ken ala kama jo e soweli tan ona".

mama li toki e ni: "jan lili mi o, jan Kikamesi li lon ma tomo Uluku. jan ala li wawa sama ona. o tawa! o kama tawa ma tomo Uluku. o toki e ijo pi jan wawa ni tawa jan Kikamesi . jan Kikamesi li pana e meli unpa Sanka tawa sina. tenpo kama la jan Sanka li anpa e jan soweli ni kepeken unpa.”

jan pi alasa soweli li kama tawa ma tomo Uluku. jan Kikamesi li kute e ona li toki e ni: "jan pi alasa soweli o kama jo e meli unpa Sanka pi tomo pi jan sewi. tenpo kama la ona li kepeken nasin meli tawa jan soweli ni. tenpo lili kama la soweli pi jan ni li tawa weka tan ona".

meli pi tomo pi jan sewi
jan pi alasa soweli en jan Sanka li tawa ma supa. tenpo suno pi mute lili pini la ona li kama lon ma supa. ona li awen. tenpo suno sin la soweli en jan soweli Enkitu li kama. jan soweli Enkitu li moku e telo e kasi anpa poka soweli. telo en kasi anpa li pona tawa ona.

jan Sanka li lukin e jan soweli Enkitu li kama tawa ona. meli li weka e len sama. jan Sanka li pilin e luka pi jan soweli Enkitu. meli Sanka li unpa e mije Enkitu. mije Enkitu li unpa e meli Sanka. tenpo suno mute la ona li unpa. tenpo pimeja mute la ona li unpa. ona li pini unpa la jan Enkitu li lukin tawa soweli. taso soweli li pilin ike tawa ona. tan ni la soweli li tawa weka. jan Enkitu li wile tawa soweli. taso ona li wawa ala pilin. ona li ken ala tawa wawa.

jan Enkitu li kama pilin e ni: ona li ken sona. jan Enkitu li pilin e ni: 'mi ken sona. mi pilin. mi jan'. ona li kama tawa jan Sanka li anpa. ona li lukin e sinpin ona li kute.

jan Sanka li toki tawa jan Enkitu. ona li toki e ni: 'jan Enkitu o! sina sama sewi. sina tawa poka soweli tan seme? o kama.'

jan Enkitu
jan Sanka li tu e len ona. ona li len e jan Enkitu kepeken len wan. jan Sanka li toki e ni: 'o kama poka mi. o kama tawa kulupu jan'.

ona li tawa tomo pi jan pi lawa mani. jan mute pi lawa pi mani mute li kulupu li lukin e jan Enkitu li toki e ni: 'ona li suli sama jan Kikamesi. ona li wawa sama suno pi sewi An'. ona li pana e pan e telo nasa jelo. jan Enkitu li moku ala. ona li lukin wawa taso. tenpo ala la ona li lukin e pan e telo nasa. jan Sanka li toki ni: 'jan Enkitu o moku e moku ni. o moku e telo ni. ni li nasin jan'. jan Enkitu li moku e pan mute. ona li moku e telo nasa jelo mute. ona li pilin pona mute. ona li telo e sijelo ona. ona li len. jan Enkitu li jan kin. jan pi lawa mani li lape la jan Enkitu li lape ala. ona li kama jo e ilo utala li utala e soweli ike. jan pi lawa mani li ken lape pona.

sitelen lape pi jan Kikamesi

jan Kikamesi li lukin lape. ona li pini lape li tawa mama meli. jan Kikamesi li toki e ni: 'mama o! tenpo pimeja la mi jo e sitelen lape. mi lukin e mun lili mute lon sewi mi. mun pi sewi An li anpa lon poka mi. mi wile sewi e kiwen ni. taso mi ken ala tawa e ona. jan pi ma tomo Uluku li sike e mun ni. mi anpa tawa ona sama ni: mi anpa tawa meli. mi toki e ijo ni tawa sina tawa ni: sina ken pana e sona pi sitelen lape ni.

mama pi jan Kikamesi li sona e ali. sewi Ninsun li sona e ali. ona li sona e sitelen lape ni li toki e ni: 'mije lili mi o! sitelen lape sina li ni: tenpo kama la jan wawa li kama tawa sina. ona li wawa sama mun pi sewi An. tenpo kama la ona li pona tawa sina. ona li pana e pona tawa sina li utala e jan ike sina. ona li jan sama sina. sina olin e ona sama meli olin. mije lili o! sitelen lape sina li pona li suli".

jan mije olin
jan Enkitu li tawa e oko li lukin e ni: jan mije li tawa noka. jan Enkitu li toki e ni: 'jan Sanka o, mi wile e ni: jan ni li tawa weka. tan seme la ona li tawa?'. jan Sanka li toki e ni: 'jan ante o, sina tawa tan seme? sina sama lukin jan pi pilin ike. sina pilin ike tan seme?'

jan mije li toki tawa jan Enkitu li toki e ni: 'tenpo lili kama la mi  en meli olin mi li wan. taso jan Kikamesi li jan lawa. a! ona li wile unpa e olin mi. tenpo pimeja pi kama wan la jan Kikamesi li unpa e olin mi. nasin pi kulupu pi jan sewi li ni: tenpo pimeja pi kama wan la jan lawa li ken unpa e meli pi jan ante".

jan Enkitu li pilin ike wawa tan toki pi jan ni. ona li toki e ni: 'mi tawa ma tomo Uluku! jan Kikamesi li unpa ala e meli sina'.

jan Enkitu en jan Sanka li tawa ma tomo Uluku.

utala

jan Enkitu li tawa lon nasin pi ma tomo Uluku. jan Sanka li tawa lon monsi ona. jan Enkitu li lon supa pi ma tomo. jan mute li kulupu lon poka ona li toki e ni: "jan ni li kama tan ma nena. ona li wawa. ona li suli sama jan Kikamesi". jan Enkitu li kama tawa tomo pi jan olin. ona li awen lon sinpin pi lupa pi tomo ni. ona li awen e noka ona lon sinpin pi tomo ni.

jan Kikamesi li kama. taso ona li ken ala kama tawa insa tomo. ona li pilin ike wawa. jan Kikamesi li kama utala e jan Enkitu. jan Enkitu li utala e jan Kikamesi. ona tu li utala. poka pi lupa tomo li tawa! ona li utala wawa. poka pi lupa tomo li pakala! ona li utala sama soweli wawa. sinpin tomo li tawa!

jan sama tu

jan Kikamesi li pini e ike utala wawa ona li pini utala. jan Enkitu li toki tawa ona li toki e ni: 'jan Kikamesi o! jan ala li sama sina. sina wawa sama sewi. mama sewi sina li kama e ni: sina wawa. sewi Enli li kama e ni: sina jan lawa. jan Kikamesi o pini pali e ike tawa jan pi ma tomo Uluku. ona li jan ike ala tawa sina. sina jan lawa pi jan ni".

jan Kikamesi li toki e ni: 'toki sina li sona li pona. sina suli li wawa. sina taso li ken toki e ni: sina suli sama mi. jan ante ala li ken toki e ni. o kama jan sama mi!". jan Enkitu li toki tawa jan Kikamesi li toki e ni: 'sina jan sama mi kin!'. jan Enkitu li uta e jan Kikamesi. jan Kikamesi li uta e jan Enkitu. ona tu li kama jan sama kin.

tan jan Ote 

kepeken 

jan Ante 

jan Mali

jan Kipo

tomo palisa pi ma tomo Papala. *181*

tenpo ni la jan ali li jo e nasin toki wan e nimi sama.

jan ali li kama tan nasin pi kama suno li kama lukin e ma supa pi lon ma Sinala li awen lon ona.
jan ali en jan poka li toki e ni tawa sama: 'o kama. mi mute o pali e ko telo li seli ali e ona' . jan ni li kepeken ko seli, lon kiwen li kepeken ko pimeja, lon ko tomo.
jan li toki e nimi 'o kama. mi mute o pali e ma tomo e tomo palisa ni, tawa sama: lawa ona li lon ma sewi. mi mute o pali e nimi, tawa sama. ante la mi mute li tawa ma ante ali.'
jan sewi Jawe li kama anpa, tawa ni: ona li lukin e ma tomo e tomo palisa ni: jan li pali e ona.
jan sewi Jawe li toki e nimi 'a! jan li wan li jo e nasin toki wan li wile pali e ni. tenpo ni la ona li wile e ijo la ona li ken pali e ijo ni.
mi mute o kama li tawa anpa li pakala e nasin toki ona tawa ni: jan li sona ala e toki pi jan poka ona.'
jan sewi Jawe li pana e jan, tawa ma ali. jan li awen ala pali e ma tomo.
tan ni la jan li nimi 'Papala' e ma tomo ni, tan ni: ma ni la jan sewi Jawe li pakala e nasin toki pi jan ali li pana e ona, tawa ma ali.

tan lipu Open 11:1-9 tan lipu Pipija
tp: wan pi toki pi jan Yves Proudhomme en jan Stephen Pope 

kepeken jan Kipo, jan Mali, jan Piotr Mittelstaedt 

jan Kosila en soweli monsuta pimeja tu wan *182*

tenpo la kulupu mama pi soweli monsuta pimeja li awen lon tomo lili lon ma suli pi kasi suli. kulupu jo e mama mije suli e mama meli pi suli insa e soweli lili. tenpo suno wan la ona ali kama lape ala sin. ona li pali e moku open ni: soweli mije li lon poki suli e ko pan en telo li seli e ona. ko en telo li pali e poki lili kon la soweli meli li pana e ona tawa poki moku tu wan. soweli lili li lon supa moku e ona. ni pini la ona li tawa noka li musi lon ma pona pi kasi suli.

lon ma poka la jan lili meli li awen lon tomo lili. meli ni li jo e linja lawa pi jelo suno. tan ni la jan li nimi 'Kosila' e ona. tenpo suno sama la jan Kosila li tawa noka ma suli pi kasi suli. jan lili li lukin e tomo lili li tawa insa. ona li lukin e supa moku e poki moku tu wan. poki ali li jo e pan seli en telo mama.

jan Kosila li moku e moku lili pi tan poki suli. taso ona li seli kin. ni pini la jan Kosila li moku e moku lili pi tan poki pi suli insa. taso ona li lete kin. tan ni la jan Kosila li moku e moku lili pi tan poki lili. ona li pona kin. tan ni la jan Kosila li moku e ona ali.
ni pini la meli li lukin e supa monsi tu wan. jan lili li anpa e monsi lon supa suli. taso ona li suli kin. jan meli lili li anpa e monsi lon supa pi suli insa. taso ona kin li suli. pini la ona li anpa e monsi lon supa lili. ona li pona kin. taso jan Kosila li anpa e monsi lon ona la jan meli li pakala e ona,
ni pini la jan Kosila li lukin e supa lape tu wan. ona li anpa lon supa suli. taso ona li sama kiwen, ona meli li anpa lon supa pi suli insa. taso ona li sama ko. pini la ona jan li anpa e sama lon supa lili. ona li pona kin. tan ni la jan Kosila li kama lape.
tenpo ni la kulupu mama pi soweli pimeja monsuta li kama sin lon tomo sama. ona ali lukin e insa pi tomo sama. soweli mije li toki e nimi 'jan li moku tan poki mi.' soweli meli li toki e sama. soweli lili li toki sama li toki e nimi 'ona li moku e pan mi ali' kin.
soweli li lukin e supa monsi li toki e nimi 'jan li anpa lon supa mi'. soweli lili li toki e nimi 'ona li pakala kin e ona'
sama la soweli tu wan li lukin e supa lape li toki e nimi 'jan li anpa lon supa mi.' soweli lili toki e nimi 'kin la ona li lon ona lon tempo ni'.
jan Kosila li pini lape li tawa wawa tomo.

tan jan Kipo kepeken
jan Bryce Leland Carlson
jan Wojciech Kotwica
jan Mali
jan Gilberto Caracciolo Morelli
jan Andy Nousen
jan Matthew Richardson
jan Chris Stutz
jan Paul Earl Swift
jan Alexei Tihanov